OpenAI ចែក ChatGPT Plus ឱ្យប្រជាជនប្រទេសម៉ាល់ត៍ (Malta) ប្រើហ្វ្រី ១ ឆ្នាំ៖ ចុះខ្មែរយើងអង្កាល?
ក្រុមហ៊ុន OpenAI បានចុះកិច្ចព្រមព្រៀងកម្រិតប្រទេសលើកដំបូង ដោយចែកគណនី ChatGPT Plus តម្លៃ ២០ដុល្លារ/ខែ ឱ្យប្រជាជនម៉ាល់ត៍ប្រើហ្វ្រី ១ ឆ្នាំ។ តោះមកមើលលក្ខខណ្ឌ និងការបកស្រាយបែបស៊ីជម្រៅជាមួយលោកអ៊ំឌីជីថល។
OpenAI ចិត្តល្អចែក ChatGPT Plus ឱ្យប្រជាជនប្រទេសម៉ាល់ត៍ (Malta) ប្រើហ្វ្រី ១ ឆ្នាំ៖ ចុះខ្មែរយើងអង្កាល?
សាកស្រមៃមើលបង បើស្រុកខ្មែរយើងមានរដ្ឋាភិបាលចេញមុខមកប្រកាសថា៖ «បងប្អូនទាំងអស់គ្នា! មិនបាច់ចំណាយលុយម្នាក់ ២០ ដុល្លារក្នុងមួយខែទៀតទេ រដ្ឋនឹងទិញ ChatGPT Plus ឱ្យប្រើហ្វ្រីម្នាក់មួយគណនី!» តើបងប្អូនយើងនឹងសប្បាយចិត្តកម្រិតណា? រឿងនេះមិនមែនជាការយល់សប្តិទេ តែវាបានកើតឡើងពិតៗនៅអឺរ៉ុប។
មានរឿងអ្វីកើតឡើង?
ក្រុមហ៊ុន OpenAI (ម្ចាស់បង្កើត ChatGPT) ទើបតែបានចុះហត្ថលេខាលើកិច្ចព្រមព្រៀងជាប្រវត្តិសាស្ត្រមួយ ដែលគេហៅថា «ភាពជាដៃគូកម្រិតប្រទេសលើកដំបូងបង្អស់លើលោក» ជាមួយប្រទេសម៉ាល់ត៍ (Malta - ប្រទេសដុំកោះតូចមួយនៅតំបន់អឺរ៉ុប)។ ក្រោមគម្រោងនេះ ក្រុមហ៊ុន OpenAI នឹងផ្តល់គណនី ChatGPT Plus ដែលធម្មតាត្រូវបង់លុយ ២០ ដុល្លារក្នុងមួយខែ ឱ្យប្រជាពលរដ្ឋ និងអ្នកស្នាក់នៅក្នុងប្រទេសម៉ាល់ត៍ម្នាក់មួយៗ យកទៅប្រើប្រាស់ដោយមិនគិតថ្លៃ រយៈពេលពេញមួយឆ្នាំតែម្តង។
លោក ស៊ីលវីអូ ស្គីមប្រ៊ី (Silvio Schembri) ដែលជារដ្ឋមន្ត្រីក្រសួងសេដ្ឋកិច្ចរបស់ម៉ាល់ត៍ បានថ្លែងបែបមោទនភាពថា៖ «យើងមិនព្រមទុកឱ្យប្រជាជនយើងដើរយឺតជាងគេក្នុងសម័យឌីជីថលនេះឡើយ»។
ចង់បានរបស់ហ្វ្រី? មិនមែនងាយៗទេបង!
របស់ហ្វ្រីគ្មាននៅលើលោកទេបង ទោះជា OpenAI និងរដ្ឋាភិបាលម៉ាល់ត៍ព្រមបើកដៃឱ្យក៏ដោយ។ ប្រជាជនម៉ាល់ត៍ដែលមានចំនួនប្រហែលជិត ៦០ ម៉ឺននាក់ (តិចជាងប្រជាជនភ្នំពេញយើងឆ្ងាយណាស់) មិនមែនដើរទៅសុំលេខកូដយកមកវាយបញ្ចូល រួចប្រើបានភ្លាមៗនោះទេ។ ដើម្បីទទួលបានកាដូដ៏មានតម្លៃនេះ ពួកគេត្រូវឆ្លងកាត់លក្ខខណ្ឌពីរយ៉ាង៖
- ត្រូវរៀនសិន៖ ត្រូវទៅរៀនវគ្គខ្លីមួយដែលរៀបចំដោយសាកលវិទ្យាល័យម៉ាល់ត៍ (University of Malta)។ វគ្គសិក្សានេះបង្រៀនតាំងពីមូលដ្ឋានគ្រឹះនៃ AI រហូតដល់របៀបប្រើប្រាស់វាដោយមានការទទួលខុសត្រូវ មិនមែនចេះតែប្រើផ្តេសផ្ទាសឡើយ។ រៀនចប់ ទើបបានគណនី។
- ត្រូវមានអត្តសញ្ញាណឌីជីថល៖ ត្រូវមានគណនី eID សម្គាល់ខ្លួនរបស់សហភាពអឺរ៉ុប (EU) ដែលមានសកម្មភាពច្បាស់លាស់ ទើបអាចទៅចុះឈ្មោះទាមទារ (Claim) យកបាន។
ហេតុអ្វីបានជារឿងនេះសំខាន់?
បើនិយាយបែបភាសាស្រុកយើង នេះជាយុទ្ធសាស្ត្រ «បាចទឹកកណ្តាលវាល តែវាលនោះតូច» របស់ OpenAI។ ម៉ាល់ត៍ជាប្រទេសតូច ប្រជាជនតិច ហេតុនេះការយកប្រទេសនេះធ្វើជា «មន្ទីរពិសោធន៍មនុស្សរស់» ដើម្បីតេស្តមើលថា បើមនុស្សមួយប្រទេសចេះប្រើ AI ទាំងអស់គ្នា តើសេដ្ឋកិច្ច និងការអប់រំរបស់ប្រទេសនោះនឹងលោតផ្លោះទៅដល់ណា? វាជាគំរូមួយសម្រាប់ពិភពលោក។
ម៉្យាងវិញទៀត ការបង្ខំឱ្យប្រជាជនរៀនមុននឹងឱ្យគណនី គឺជាចំណុចវៃឆ្លាតបំផុត។ AI វាដូចជាកាំបិតមុតអញ្ចឹងបង បើឱ្យទៅចុងភៅ គេហាន់ bន្លែធ្វើម្ហូបឆ្ងាញ់ៗ តែបើឱ្យទៅក្មេងមិនដឹងអី វាអាចនឹងមុតដៃខ្លួនឯង។ ការបង្រៀនឱ្យចេះប្រើប្រាស់ដោយទទួលខុសត្រូវ (Responsible AI) ជារឿងដែលត្រូវធ្វើជាដាច់ខាត។
ចាក់បន្តិច តែចំៗ៖ ខណៈពេលដែល OpenAI កំពុងដើរធ្វើបុណ្យ ចែករបស់ហ្វ្រីឱ្យប្រទេសកោះតូចមួយសោះ ងាកទៅមើលមហាអំណាចអង់គ្លេសវិញ ស្រាប់តែ OpenAI ដើរចេញចោលគម្រោងរាប់ពាន់លានបាត់។ មូលហេតុអីដឹងអត់បង? ព្រោះអង់គ្លេសលេងថ្លៃភ្លើងកប់ពពក ហើយច្បាប់ទម្លាប់រញ៉េរញ៉ៃពេក។ ឃើញទេបង? ពេលខ្លះអាងខ្លួនជាអ្នកមាន មានលុយ មានអំណាច តែបើធ្វើខ្លួនរញ៉េរញ៉ៃពេក គេដើរចេញចោលដូចតែគ្នា មិនចាញ់អ្នកស្រុកកោះតូចៗឡើយ។
លក្ខខណ្ឌ និងចំណុចខ្វះខាតដែលត្រូវដឹង
ទោះបីជាមើលទៅគួរឱ្យច្រណែន ប៉ុន្តែគម្រោងនេះមានអាយុកាលតែ ១ ឆ្នាំប៉ុណ្នោះ។ ចុះបើផុត ១ ឆ្នាំទៅ? ប្រជាជនដែលធ្លាប់តែប្រើ ChatGPT Plus របស់ល្អ ល្បឿនលឿន ចេះវិភាគទិន្នន័យ ជួយធ្វើការងារការិយាល័យងាយស្រួល ប្រាកដជា «ជក់ចិត្ត» ដកខ្លួនមិនរួចឡើយ។ ដល់ពេលផុតកំណត់ បើចង់ប្រើបន្ត មានតែម្នាក់ៗលូកហោប៉ៅបង់លុយខ្លួនឯង។ និយាយចំទៅ វាដូចជាយុទ្ធសាស្ត្រទីផ្សារ «ឱ្យភ្លក់ហ្វ្រី ឱ្យជក់ ដល់ពេលចង់ឈប់លែងបាន ក៏ព្រមបង់លុយ» អញ្ចឹងបង។